(चाल: घटा घनघोर घोर...) 

काय योग साधला ? जन्म तुला लाभला, कोण देव पावला ?।

बिचाऱ्या ! भजनासि लागला रे !।।धृ0।। 

असशिल केले पुण्यदान  त्वा,अथवा  साधू  सेवा ।

म्हणूनि कळले तुजला सखया, अंतरि देव भजावा ।

धर्म हाचि आपुला,कोणि तुला दाविला? कोण देव पावला? ।

बिचाऱ्या ! भजनासि लागला रे ! ।।१।।

कितितरी असंती लोक जगामधि, देव तया ना ठावे ।

खावे ल्यावे प्यावे ! सगळे म्हणती मरुनी जावे ।

तूच कसा त्रासला? नादि या उल्हासला? कोण देव पावला ?।

बिचाऱ्या ! भजनासि लागला रे ! ।।२।।

बाळपणी खेळाशि खेळती, तरुणपणी विषयाशी ।

वृध्दपणी मग जाति इंद्रिये, मार्ग  दिसेना  त्यासी ।

हेत कसा जाणला, अनुभवा आणला? कोण देव पावला ? ।

बिचाऱ्या ! भजनासि लागला रे ! ।।३।।

जाशि तमाशा, खाउनि मासा, पिउनी गांजा दारु ।

कोणी पुसेना त्यांना जगती, म्हणती  मारु - मारु  ।

तूच कसा वाचला-रंगणि या नाचला ? कोण देव पावला ?।

बिचाऱ्या ! भजनासि लागला रे ।।४।।

पूर्वीपासुनि असशिल केली, जोड तुवा पुण्याची ।

तुकड्यादास म्हणे, म्हणुनी तुज जोड मिळाली याची ।

नरदेह तारिला, जन्म हा उध्दारिला,कोण देव पावला? 

बिचाऱ्या! भजनासि लागला रे! ।।५।।