(चाल :अवताराचे कार्य कराया...)

देवावरती भार टाकुनी, भारतीयांनो ! बसला का ?।।धृ0।।

कर्तव्याविण कोणाला तरि,लाभ मिळाला का जगती ? 

जी वस्तु मिळणेच नसे, त्यासाठी असला रुसला का ? ।।१।।

दैव असे ना देव असे, दुर्बल लोकांना  साथ   करी ।

उठा गड्यानो ! व्हा सावध, या अज्ञानांतरि फसला का? ।।२।।

कर्तव्याविण राहति जगति, जगणे त्यांचे योग्य नसे ।

राव-रंक वा साधु असो तो,असला का आणि नसला का ? ।।३।।

पूर्वज अपुले कार्य करोनी, जगता सुखवोनी गेले ।

काय अम्ही वंशज त्यांचे ! ऋण नाही म्हणोनि हसला का ? ।।४।।

तुकड्यादास म्हणे सत्कर्मा, देव-दैव होती साथी ।

करा करा निजकार्य अतातरि, भीतीने घरि घुसला का ? ।।५।।