(चाल: मन मोह गयी रे प्यारी कुटिया...)

भेदभाव कशाला, माणसा माणसात रे ? ।।धृ0।।

अपुल्या समानचि प्रीती सर्वांना । 

अपुल्या जिवाचा  मोह  सर्वांना ।

हे नाते ओळखावे जीवनात रे ! माणसा-माणसात रे ।।१।।

तो एक  करुनी   सामान   देतो ।

मी एक करूनी त्यासी पुरवितो ।

दोघांचा जीवनात दिसे हात रे ! माणसा-माणसात रे ।।२।।

दोघे मिळूनी  जीवनास  साजवी ।

दोघांचा संसार ऐक्याने दाखवी ।।

मग काय दाखवावी जात रे ! माणसा - माणसात रे ।।३।।

सकळासि कळू दे  हा धर्म   वेड्या ।

तोडोनि टाकी ह्या भेदांच्या बेड्या ।

तुकड्या म्हणे जुनी टाक कात रे ! माणसा-माणसातरे ।।४।।