(चाल: अवताराचे कार्य कराया...)

माणूस द्या मज, माणूस द्या ही भीक मागता प्रभु दिसला ।।धृ0।।

लोक दर्शनासाठी जाती, देव दिसावा म्हणुनीया ।

देव म्हणे मज माणुस न दिसे, अजब तमाशा हा असला ।।१।।

माणुस कसला हवा तुम्हाला? सांगा तरि मी शोध करी ।

तव बोले प्रभु केविलवाणा, कुटिल नको असला तसला ।।२।।

जंबुक, मेंढ्या, कुतरे, डुकरे, बहुत मिळे तरि काय करू ।

यांना शहाणे करण्यासाठी, मला हवा माणूस भला ।।३।।

हृदयाचा जो सरळ असे अणि ज्यावर सगळे लोभ करी ।

नम्र सदा सेवेला तत्पर, मोह न ज्या अपुला कसला ।।४।।

सकल लोक हे अपुले म्हणुनी, सर्वाकरिता प्रेम करी ।

तुकड्यादास म्हणे प्रभु मागे, असेल कोणी द्या त्याला ।।५।।