(चाल: सुखे नांद सखेबाई...)

पाहिले का गुरुकुंज ?   - तुम्ही    आजवरी !

अभाग्यासी -भाग्य लाभे, जाता तोवरी हो ! ।।धृ0।।

महाद्वारि येता झणी, वाटे आलो तिर्थाटनी ।

भक्तिभाव   दाटे   नयनी, जशी   पंढरी   हो ।।१।।

स्वच्छ मार्ग न्याहाळीत, द्वारामागे द्वार येत ।

संत-बोध लिहिले वरती, जिवा  उध्दरी  हो ।।२।।

दिसे खुले सर्वांसाठी, देवद्वार घ्याया भेटी ।

संतवचने    ही    कंठी,   अनुभवे   पुरी   हो ।।३।।

प्रपंच नि परमार्थाची जोड साधलीसे साची ।

दाटि  नव्या   मानवाची, लाभते    खरी   हो ।।४।।

सर्व तीर्थ, सर्व  संत, प्रार्थनेच्या    मंदिरात ।

आप दुजा   नाही  त्यात, भेद   तिळभरी  हो ।।५।।

सर्व मिळुनी करिती भक्ती,सर्व मिळूनची उन्नती ।

तुकड्या म्हणे  सर्वाभुती, बोधती   हरी   हो ।।६।।