(चाल: तेरि प्यारी सूरतियाँ... )

माझे सुंदर जीवन पाहोनी, त्या प्रभुचि दया हो झणी

असे असु‌ दै !

माझे अंतरपट तर निरखोनी,त्या प्रभूचि दया हो झणी

असे असु दे ! !.. ।।धृ0।।

ब्राह्म-मुहूर्ती उठतो मी,प्रभू स्मरण मनि करितो मी ।

स्नान करोनि ध्याना लागी, रोज मंदिरी बसतो मी ।।

माझे सुंदर जीवन0।।१।।

असत्य माझी वाणी नसे, मुफ्त कधी मी खात नसे ।

कष्ट करावे,तरिच जगावे याचा पाठचि करितो मी ।।

माझे सुंदर जीवन0।।२।।

वस्तु व्यवस्था साफ करी, घाण नसे मुळी दारी -घरी ।

दारावती फुले-वाटिका, श्रमदानाने काम करी ।।

माझे सुंदर जीवन0।।३।।

नम्र सदा मी जनतेला, कधी न झगडा मी केला ।

प्रेमळ राहावे सर्व जगासी, हे चिंतन मनि धरितो मी ।।

माझे सुंदर जीवन0।।४।।

सर्व असे जरि नित्य करी, सद्गुरुचा नच हात शिरी ।

तुकड्या सांगे, काम न रंगे, अनुभव हा हो संतजनी ।।

माझे सुंदर जीवन0।।५।।

                       - गुरुकुंज आश्रम, दि. 0१-११-१९६१