(चाल: उद्धवा अजब तुझे सरकार...)

मानवा ! का चिंता वाहतो ?

होणारे ते चुके न केव्हा, प्रभु सगळे पाहतो ! ।।धृ0।।

नर जन्माला आला जेव्हा ?

तू कधि केले होते   कामा ? ?

परी तुझ्या पोटाची कळकळ, जन्मताचि वाहतो ! ।।१।।

अजगर पडला पडुनी राही ।

चालतसे    मुंगीच्या   पायी ! !

अचूक त्याची खळगी भरण्या, जागिच कुणि दाहतो ! ।।२।।

पोपट - मैना   मारि   भरारी ।

कुठले त्यांना स्थान नोकरी ? 

परी चरुनिया, रोजची येती,मन्मनि उत्साहतो ! ।।३।।

म्हणुनि सांगतो स्मर तू हरिला ।

विसरु   नको  रे  सहकार्याला ?

तुकड्यादासा,अनुभव ऐसा,घडि-घडि मज राहतो ! ।।४।।

                        -गुरुकुंज आश्रम, दि. 0१-११-१९६१