(चाल: गाडीवाले ! गाडी धीरे...)

भाविकांच्या मेळ्यात दिसला हरी !

धावोनिया सगळ्यांची कामे  करी ।।धृ0।।

विद्वानांच्या, पुराणिकांच्या आसऱ्यासही नाही !

सत्ताधारी,   महंतखोरी   यांना  दुरुनी    पाही ! !

नम्र सदा सेवेला असती, बसतो  त्यांचे  घरी ! ।।१।।

शेतावरती मजूर जाती, जातो  त्यांच्यासवे !

भाकर-भाजी खाउनि राजी, गात असे गोडवे ! !

जातपातहि कधी न पुसली, मोहित  प्रेमावरी ! ।।२।।

ईमानदारी प्रिय तयाला, सदाचार   आवडे ।

कुणी कुणाचे रक्त शोषिता, क्रोध हरीला चढे ।।

तुकड्यादास म्हणे भक्तिने, नाचतसे    पंढरी ! ।।३।।

                                        -इन्दोर, दि. 0४-0८-१९६0