(चाल: सुनते थे नाम हम..)

आता वाजला रे ! डंका, घेऊ नको शंका,

हे सुधरायला गाव सारे लोक लागले ।।धृ0।।

डोक्यावर टोपली, हातात फावडे, मुखात नामघोष, देवासि आवडे ।

हेचि साधन आता साधले,कोणी सडका करी, कोणी बांधी विहिरी ।।

हे सुधरायला गांव सारे लोक लागले ।।१।।

आपलेच गांव आता तीर्थाचे स्थान, गावासि सुधराया देताति दान ।

याहूनि पुण्य नाही चांगले, सारे झाडझुड करी, स्वच्छ राहती घरी ।।

हे सुधरायला गांव सारे लोक लागले ।।२।।

मोठे जघीनदार भूदान देती, संपत्तिदानाची ऐसीच रीति ।

भूमिहीन नाही राहिले, कष्टी लहान थोर, श्रम करुनि फार ।।

हे सुधरायला गाव सारे लोक  लागले ।।३।।

गरिबाची झोपडी बघताची मोडली, सर्व तरुणांनी सुधारोनि जोडली ।

सौंदर्य सजवोनि आणले, दास तुकड्या म्हणे, हेचि गाती गाणे ।।

हे सुधरायला गाव सारे लोक  लागले ।।४।।

                                   - गुरुकुंज, दि. १२-0८-१९५४