कशी रे उलटी धरिली धुरा ?
(चाल: तुझी रे सारी उलटी तऱ्हा...)
कशी रे उलटी धरिली धुरा ?
सत्य - पथाची सोडूनि प्रीती ।
धरिली हृदयी सुरा ।।धृ0।।
शिक्षित सारे मित्र तुझे ते ।
सुंदर-गुणिजन-तरुण असे जे ।
शिकवुनि त्यांना वाईट व्यसने ,
करिसी जीवन चुरा ।।१।।
राष्ट्र तुझ्यावर भिस्त ठेवते ।
तरुण शिपायी तू म्हणुनी ते ।
तुझ्या भोवती का अवगुण ते ।
समजुनी घेई पुरा ।।२।।
उठ जागा हो भोवती बघ हे ।
शत्रूसम तुज पाहत जग हे ।
तुकड्यादास म्हणे ऐकेना -
निर्मल हो नरविरा ।।३।।