(चाल: मराठे शूर वीरांनो...)

अहो मंदीरवाल्यांनो ! भाविका जागवा आता ।

करा कर्तव्य-तत्पर ते, देऊनी भक्तिची संथा ।।धृ0।।

सावता शेतिवर जातो, मुखाने विठ्ठला गातो ।

निपजवी तो मुळा-भाजी, हर्ष त्या पंढरीनाथा ! ।।१।।

पुंडलिक भक्त तव झाला,तोषवी आईवडिलाला ।

देव पाहण्यास जव आला, हर्षला कार्य ते बघता ।।२।।

जनाई गोवरी वेची, गोरोबा घडवितो मडकी ।

देव उचलावया ओझे, धावतो चोखया   येता ।।३।।

हाचि उपदेश सर्वांना, करा निर्माण कार्यासी ।

म्हणे तुकड्या भक्ति ऐसी, आवडे पंढरीराया ।।४।।