(चाल: संदेशा पूज्य गांधी का...)

निघु दे दिवस मंगल तो, बघाया भारता ! तुजला ।अवकळा लोपुनी सारी, मिळो सुखशांती सकळाला ।।धृ0।।

राष्ट्र   बलवान   हो   रक्षो, 

सदा अपुल्या स्वराज्यासी । 

पूर्णता लोकशाहीची, भुकेला जीव  बघण्याला ।।१।।

मिटो अस्पृश्यता सगळी ।

कळो   मानव्यता  समता ।

भेद‌ श्रीमंति-गरिबीचा, न भासो भावि कोणाला ।।२।।

कळो चारित्र्यता सगळ्या,

नीति   जी   रामराज्याची ।

नष्ट हो दुर्व्यसन आता, मिळो उद्योग जनतेला ।।३।।

भिकारी ना दिसो कोणी,

आळसी ना असो कोणी ।

मिळो बहुमान मातांना, जसा देशात  पुरुषाला ।।४।।

दु:खवो ना कुणी केव्हा,

भावना अन्य धर्माच्या ।

प्रीय आपुल्यास तो जैसा,प्रीय हो अन्य सकळाला ।।५।

दृष्ट, खल, गुंड, छल - द्वेषी,

म्हणे तुकड्या नसो आता ।

न्याय-सत्ता बघो त्यांना, मनोभ्रम दूर  करण्याला ।।६।।