मना भासे गजानन ! हा, खरा अवतार देवाचा
(चाल : लगाले प्रेम ईश्वरसे... )
मना भासे गजानन ! हा, खरा अवतार देवाचा ।
कराया कार्य जनतेचे, प्रगटला मानवी साचा ।।धृ0।।
कुठे श्रीकृष्ण ! होऊनी, कुठे श्रीराम होऊनी ।
कुठे नरसिंह ! होऊनी, प्रगटतो नाथ प्रेमाचा ।।१।।
कुठे ज्ञानेश गुरू ! झाला, कुठे तुकया ! म्हणो आला ।
कुठे शेगावी अवतरला, असा अवतार क्रम त्याचा ।।२।।
कुठे तो विश्वची नटला, कुठे सोंदर्यवत् झाला ।
तयाची अगम्य ही लीला, कथाया खुंटते वाचा ।।३।।
म्हणे तुकड्या प्रभू भक्ता, न भासे भेदची पहाता ।
तयाची सर्वची सत्ता, हरी नटला गमे साचा ।।४।।