(चाल: कृष्ण कृष्ण मैं पुकारु...)

भारतभूच्या प्रीय महात्म्या !

तव यश   विजयी   राहू   दे ।।

स्वतंत्र झालेल्या देशाला, पुढे पुढे सरसावू दे ।।धृ0।।

क्षमा करी अपराध आमुचा, जो तुझ्याप्रति जाहला ।

वर्ष - वर्ष ना मिटे, जो डाग   हृदया   लागला ।

अज्ञ म्हणुनी सोड, पश्चाताप मानसि पावू दे ।।१।।

पूर्ण करण्या भावना तव, शक्ति सगळ्यांना असो ।

रामराज्यचि हो पुन्हा, ऐसी जनी भक्ती दिसो ।

पक्षांधता मतभिन्नतेचा द्वेष विलया जाऊ दे ।।२।।

कीर्ति व्यापू दे तुझ्या दुरदृष्टिची या    भूवरी ।

सत्यतेची-शांततेची रंगु   दे  जग - वैखरी ।

दास तुकड्या मागतो, मज नित्य तव गुण गाऊ दे ।।३।।