(चाल: अवताराचे कार्य कराया...)

यारे या प्रोढांनो ! साक्षर होण्यासाठी सर्व जमू !

मातांनो ! या, मिरा, जनाई, मुक्ताईचा मार्ग क्रमू ।।धू0।।

निरक्षराला कोणि न पुसती,

ऐसा   आला    काळ   अता ।

समाज-शिक्षा या साठिच ही, अपुल्या गावोगावि रमू ।।१।।

उत्तम राहूनि, मधुर बोलुनी,

शरीराला    सुदृढ    करूनी,

देशासाठी सर्वचि जागू सानथोर हा मार्ग क्रमू ।।२।।

पूज्य महात्मा गांधी अपुल्या,

देशाचा        नेता       गेला ! !

त्यांची उरली इच्छा पुरती, करण्यासी गुरुदेव नमू ।।३।।

समुदायाने भजन   करू,

प्रार्थना करु सद्भावाने ।

भारतमाता उन्नत व्हाया, सेवाप्रेमे संदा श्रमू  ।।४।।

स्वतंत्र  झाला   देश   खरा ,

पण शेतकरी दु:खी अजूनी ।

तुकड्यादास म्हणे यासाठिच, साक्षर होउनि देश भ्रमू ।।५।।