(चाल: अज काहेको धूम मचाते हो !...)

भूदान करा, धनदान करा , 

ही पुकार घ्या श्रमिकांची, बहु वेळ नसे कामाची ।।धू0।।

आज सांगती विनंति करुनी, त्यागी-संत-पुढारी ।

कोण सांगतो वेळ? उद्याच्या जनतेची ललकारी ।।१।।

सर्व मिळोनी बंधु म्हणोनी, नांदु   अपुल्या  देशी । 

करा करा तातडी मित्रहो, वेळ न द्या परक्यांसी ।।२।।

उपवासी पोटाचा  अग्नी, पाप - पुण्य   समजेना ।

शांतिने क्रांती न झाली तर आवरि कोण धिंगाणा ।।३।।

श्रमीक चिडतिल मधेच अडतिल,पडेल भूमि रिकामी।

मार्ग मिळे जो करतिल जन ते, होऊनिया अनिवारी ।।४।।

रक्त वाहवूनि नको क्रांति ती, म्हणुनि याचना सगळी ।

भू-दानाला यश ना  ये  तर, येईल  तेचि कपाळी ।।५।।

समाज हा समतोल असावा, मानव जगण्यासाठी ।

तुकड्यादास म्हणे-सुजनांनो, ऐकुनि बांधा गाठी ।।६।।

                                     - पंढरपुर, दि.२४-0७-१९५३