(चालः कसा निभवशी काळ..)

भक्तिहीन मी पुरा अभागी, घे   पदरी   माते !

काहि कळेना काय करावे, साधन तव परते ? llध्रुll

मनोभाव तव चरणी जडला, मम जगदामाई !

तुझ्यावाचुनी काहि कळेना, तूचि कृपा-सहाई  l।१।।

योग-याग, जप-नेम धर्म हे, न रुचे मज काही ।

जन्मापासुनि हेचि आवडे, मज   दुसरे  नाही ।।२।।

तुचि निभवशी काळ माय गे ! भाव पुरा माझा ।

जाणुनिया हे ब्रीद दयाळे ! ये   धावत   काजा ।।३॥

तुकड्यादासा नाम तुझे ते, दे हृदयी वाचे ।

हेचि मागतो निशिदिनि माते ! न प्रेम   इतराचे ॥४ ॥