(चालः तुम्हारे पूजन को भगवान..)

नको आम्हा दुनियेचा मान, प्रभु रे ! तव पायाची आण ॥धृ०l।

जग हे काहि म्हणो आम्हासी, आम्ही सोड न तव पायासी ।

जावो सेवा करिता प्राण, प्रभु रे ! तव पायाची आण ॥१॥

कोणी म्हणोत वेडा झाला, कोणी म्हणोत वाया गेला ।

आम्ही मानु तयाला छान, प्रभु रे ! तव पायाची आण ।।२।।

झाडू संत-पदाची धूळ, तेणे उद्धरु अमुचे कूळ ।

देउ देह गुरुसी दान, प्रभु रे ! तव  पायाची  आण ॥३॥

सेवुनि संतांचा उपदेश, जाळू त्रैतापाचा द्वेष ।

तुकड्या म्हणे करु गुणगान, प्रभु रे ! तव पायाची आण ।।४।।