(चाल: घे करुणा गा घे करुणा..)

मज दावा हो ! मज दावा हो ! मज दावा राम विसावा हो !  llधृ०।।

नेत्रांजन घालुनि द्या कोणी, धुंडुनि आलो रानोरानी ।

तो वनमाळी न दिसे नयनी, भुललो निजगुण भावा हो ! ।।१।।

काय कुणा ऐसी भिक मागू ? दू:ख मनाचे कवणा सांगू ?

रामाविण मन झाले पंगू, त्या चरणी   मज   लावा  हो ! ।।२।।

सोशित दुःखा बहु श्रमलो मी, भवसागरि बुडता दमलो मी ।

विषयाचे भोगी भ्रमलो मी, न मिळे   कोठे   ठावा  हो ! ।।३।।

भक्तजनांचा तो कैवारी, संकट हे मम दूर निवारी ।

जो निज भक्तांचा हितकारी, तुकड्यादास सुखवा हो ! ।।४।।