(चाल: कसा निभवसी काळ..)

पोटासाठी हिंडविसी का मज दारोदारी ?

त्रासी बहु जाहलो त्रिविध या तापांनी भारी ॥धृ०।।

न धरी कोणी पोटी मजला श्री यादवराया !।

आस तुझ्या चरणांची म्हणुनी पडतो चरणी या ॥१।I

दीनानाथ तू दयाळू म्हणविसि आलो तुजपासी।

देई चरणी ठाव मला तू , का  निष्ठुर  होसी ? ॥२॥

कसे रक्षिले भक्त सर्वही ? मजसि नवल वाटे ।

ऐकुनि भक्त-जनांची कीर्ती हृदयि प्रेम   दाटे ॥३॥

वस्त्र पुरवितो धावुनि कैसा त्या भक्तांसाठी ?

लागतसे तव चरणी देवा ! मज आवड मोठी ॥४॥

कधी न सोडी चरण तुझे मी, आण तुझी आई !

वाटे मजला प्राणचि द्यावा  तव   चरणाठायी ॥५॥

गुरु आडकुजी ! होई पावन त्वरित अगा ! मजसी ।

दास तुकड्या शरणचि आला, झाला परदेशी ॥६॥

करुणाकर श्री सदगुरुराया ! विठ्ठल ! नरहरी !

त्रासी बह जाहलो, त्रिविध  या  तापांनी  भारी ॥७॥