( चाल : दुनिया न भावे मोहे . . )

कुणीतरी सांगना , कुणीतरी सांगना , 

हरिदर्शनासी काय पाहिजे ? कुणी सांगना ।।धृ०॥ 

घरदार सोनिया रानोरानी हिंडती । 

गळा माळ, भाळी टिळा, आसनेही मांडती ।। 

करिताती जपतप, तरी शांति येईना । 

हरिदर्शनासी काय पाहिजे ? कुणी  सांगना ।।१l। 

ग्रंथ वाचणारे म्हणती - वेदश्रुती वाचली । 

तीर्थाटने केली सारी, योगमुद्रा साधली ।। 

जी हानी ना ये काही, किती करा याचना ।। 

हरिदर्शनासी काय पाहिजे ? कुणी सांगना ।। २॥ 

दान धर्म व्रते केली, तीही न येती कामा ।

संतसंगतीचा महिमा सर्व सांगती आम्हा ।। 

संतसंग केला तरिही दोष कांही जाईना । 

हरिदर्शनासी काय पाहिजे ? कुणी  सांगना ।।३।। 

सर्व काही केले तरिही, एकचित नाही झाले ! 

भांबावले लक्ष सारे, तुकड्यासी हेचि स्फुरले ।। 

निश्चयाचे बळ नाही तरी हरि येईना । 

हरिदर्शनासी काय पाहिजे ? कुणी   सांगना ।।४।।