दुर्गा सिंहावरती स्वार ! कराया दुष्टांचा संहार ! !
( चाल : सरपे टोपी लाल . . )
दुर्गा सिंहावरती स्वार ! कराया दुष्टांचा संहार ! !
धरी तरवार करी !
शक्तीचा संचार करुनिया .भक्तांचा सत्कार ।।
महा उपकार करी ! ॥धृ॥
रत्नजडित शोभे कांति , दिव्य तेज मुकुटावरती
फाकली प्रभा ती भोवती ।
दर्शनात वाटे शांति ! दूर होई भीति - भ्रांति ।
करी कामनेची पूर्ति ।
रिता तव आधार , उध्दरी भक्तांचा संसार ।
धरी तरवार करी ! ॥१॥
लाल कुंकू मळवट भाळी , पिंताबराची कंचोळी ।
पीत वस्त्र अंगी सगळी !
द्वारि पुष्प - वेली - डाळी । दारि शोभल्या रांगोळी ।
धूप - दीप जळती सगळी !
वंदी तुकड्यादास , लागू दे तव सेवेचा ध्यास ।
धरी तरवार करी ! ॥२॥
रेल्वे प्रवास , मुंबई दि. २०-१०-१९५९