(चाल: सदा तुझ्या चिंतनी रहावे..)

मिळे न श्रीहरि तुला जरि न देहाभिमान हरसी ।

मायबाप - घरदार - सोयरे त्याग जरी करसी ॥धृ०॥

सोडनिया व्यवहार जगाचा जरि वन-वन फिरसी ।

विषय त्याग करुनिया नग्र होऊनि जरी बससी ॥

तरि परमेश्वर न मिळे रे ! तुज जरि प्राण त्यजसी I

                               मायबाप -  घरदार 0 ॥१॥

सोडूनि गादी - ताकिये मोती - हिरे - मोहरा रे I

जरी त्यागासी लोक - बोलणे जात - पंथ सारे ॥

दीनदयाळ न मिळे तुला हटयोग जरि करिसी I

                                मायबाप - घरदार 0 ॥२॥

रात्रंदिन जरि उभा आंग धरणीवरि ना धरसी I

उदार होऊनी शरीर जरि तू खाक गडया ! करसी ॥

पुण्यदान तप - जप यांनीही न मिळे हरि तुजसी ।

                                मायबाप - घरदार 0 ॥३॥

आडकुजींच्या कृपे सांगतो तुकडया हा तुजसी I

सकळाठायी जाणुनि हरि तो लीनपणा धरसी ॥

तरीच प्राण्या ! भवसागर रे ! त्वरीत तू तरसी I

                                 मायबाप - घरदार 0 ॥४॥