काय करु सांगना ? कुणास सांगु सांगना ?
( चाल : कैद में है बुलबुल . . . )
काय करु सांगना ? कुणास सांगु सांगना ?
उतावळे मन आता , काही केल्या राहिना ! ॥धृ०॥
कोणीतरी बोलले , प्रभू आम्ही त्यास पाहिला ।
आम्हासवे हासला नि आम्हासवे जेविला । ।
कोणीतरी बोलले , प्रभू आम्ही पाहिला ।
कोठे दळू लागला नि ढोरे ओढू लागला । ।
आम्ही काय केले पाप , म्हणुनि भेट होइना ।
उतावळे मन आता , काही केल्या राहीना ! ll१ll
कोणीतरी बोलले की , भक्ति त्यास पाहिजे ।
अहोरात्र निज - ध्यास , ध्यानि - मनी राहिजे । ।
काम - क्रोध - लोभ - मोह - मत्सरादि नाही जे ।
आशा - पाश निवारोनी साधनीच राही जे । ।
आम्ही तरी दुजे काय केले पाप पाहिना ।
उतावळे मन आता , काही केल्या राहिना ! ॥२॥
कोणीतरी बोलले की , योग - याग करावा ।
तीर्थाटनी भ्रमोनिया मग देव पहावा । ।
कोणतेहि रूप धरा , विश्वास हा ठसावा ।
बोले तैसा चाले त्यासी सन्देश हा पुसावा । ।
तुकड्यादास म्हणे - सगळी वेडावली भावना ।
उतावळे मन आता , काही केल्या राहिना ! ।।३।।
- नागपूर , दि . ०७ - ०९ - १९५९