देव हा पहातो मजकडे !
( राग : मांड ; ताल ; अध्धा तीन ताल . )
देव हा पहातो मजकडे !
नेत्र भरोनी येती सगळे ,
वाहतो पूर प्रेमाचा दुथडे ! ॥धृ०॥
सात्विक श्रध्दा हृदयी उसळे ।
सुमनांचा सद्विचार द्रवळे ।
दाटूनि दाटूनि कंठ उफाळे ।
प्रगटले ते रुप सावळे ॥१॥
मी पाहतो तो पाहतो मजसी ।
भेदचि नाही जणु दोघासी ! ।
एकचि झाले दोन आकडे ।
मिटले जणु जन्माचे कोडे ॥२॥
आड नका हो येऊ कोणी ।
भरले मन हे आनंदानी ।।
तुकड्यादासा इकडे - तिकडे ।
चोहोकडे प्रभुचे पोवाडे ! ॥३॥
- गुरुकुंज , दि . ०४ - ११ - १९५९