नच उणा पाहिरे तू कुणा ।
( चालः राग ; देश ; ताल ; तीनताल . )
नच उणा पाहिरे तू कुणा ।
नाहि या कुणी दुजा प्रभुविणा ! llधृ०॥
सकल विश्व हे त्यातचि भरले ।
व्यापुनि सकला आणिक उरले । ।
अंतर्मुख होउनि पाहिना ॥१॥
भेद समुळ हा जीवदशेचा ।
अज्ञानाचा गुण - दोषाचा । ।
दे झुगारुनि सर्व कल्पना ! ll२ll
जे तुजपाशी ते इतरासी ।
मग का कोणा भिन्न पाहसी ? ।।
उपभोगी आनंद मन्मना ! ॥३॥
तुकड्यादासा प्रेम मिळाले ।
पूर्णातुनि या पूर्ण निघाले । ।
शेवट पूर्णची राहिना ! ।।४।।
- गुरुकुंज आश्रम , दि . ०२ - ११ - १९५९