मज सवे बोल रे माधवा ।
( चाल : राग ; देश ; ताल : तीनताल . )
मज सवे बोल रे माधवा ।
नाही दुजा कुणि मजसी राघवा ! ॥धृ०॥
बहू दिवसाचा स्मरतो तुजला ।
पहाया तुज हा जीव भुकेला ।
वेळ न लावी उगिच आघवा ॥१॥
सोडुनि जव जाइल मज वाचा ।
सांगिल कैसा भाव जिवाचा ?
म्हणतो म्हणूनिच वेळ नसावा ! ॥२॥
इंद्रिय हे जव गळतिल सारे ।
मग पाहू तुज कोण अधारे । ।
सगुण गुणाचा प्रेम हा नवा ! ।।३।।
तुकड्यादासा तुझा भरवसा ।
आजवरी मी धरला ऐसा ।।
शेवट तव पदी देई विसावा ! ।।४।।
- गुरुकुंजआश्रम , दि . ०२ - ११ - १९५९