(चाल: दिवाना बनाना हो तो...)

कुणि सांगिना पता हरिच्या, गावि जावया ।

मन बावरे सदा फिरते,  त्यासि   पहावया llधृ०ll

म्हणताति संतही देती, मार्ग   दावुनी ।

इतुका करा उपकार, तया भेटवा कुणी ।

अर्पीन   तुम्हापायि  तनू,   भेट   घ्यावया ।।१।।

रानी वनी कुणी फिरती, साधिती   तपा ।

दरी-खोरी कुणी फिरती, लाभण्या रुपा ।

परि दूर हरी हा न दिसे,   कष्ट   करुनिया l।२।।

कुणि सांगती जनी हरि हा, येई धावुनी ।

परि भक्त पाहिजे त्यासी, प्रेमभावनी ।

तुकड्यासि दया द्या इतुकी, लाभवा तया ।।३।।