कुणी फावडे घ्या, कुणी टोपली घ्या
( चाल - कुणी गोविंद घ्या , कुणी गोपाळ घ्या . . )
कुणी फावडे घ्या, कुणी टोपली घ्या,
कुणी कुदळी घ्या,या रे ! धावुनी ।। धृ० ॥
रासलीला ही याच युगाची । श्रमदानाची , धनदानाची ।
हाती काम नि मुखि गाणी ॥ १ ॥
गोपाळाचे तुटके घर हे । पाणि - हवेने अति जर्जर हे ।
बांधुनी काढू सर्व झणीं ॥ २ ॥
लैन धरोनी टाका दोरी । ओटे - उकिरडे घ्या माघारी ।
सुंदर सजवू गांव गुणी ॥ ३ ॥
स्वच्छ करु हे घर - घर सारे । टापटिपीने सजवु दारे ।
सुंदर अक्षरि लिहू म्हणी ॥ ४ ॥
रांगोळी दारावरी घाला । सांगा तारा - शांति मीरेला ।
मार्ग दाखवू शोभवुनी ।। ५ ।।
चला चला रे ! त्वरा कराना । काम करोनी करु मग स्नाना ।
राहु उभे, सांगु नमुनी ॥ ६ ॥
श्रमदानाने विहिरी बांधू । जीर्ण मंदिरे उत्तम साधू ।
विद्यामंदिर बांधू झणीं ॥ ७ ॥
जीर्ण अखाडे फिरुनि सुधारु । आरोग्यालय मिळूनि उभारु ।
राहू नका माघारि कुणी ।। ८ ।।
सर्व मिळोनि करु श्रमदाना | ब्राह्मण - क्षत्रीय - वैश्यही याना । हरिजन घ्या अपुले म्हणुनी ॥ ९ ॥
या बंधूंनो ! या भगिनींनो ! वडिल जनांनो ! ऋषि - साधूंनो ।
तुकड्या म्हणे उठा झोपेतूनी ।। १० ॥
- पुसद , दि . १९ - ०२ - १९५५