(चाल: पतीतपावन नाम..)

धन्य धन्य सद्गुरुराज ! हे वैभव ज्ञानाचे |

काहि कळेना वर्णन करिता, न पुरे मन अमुचे ।।धू० ।।

अगाध तो ज्ञानामृत-सागर, बसला मुखस्थानी ।

सहजची राहे हृदयी गुरुच्या, रंगुनिया वाणी ।।१।।

चोदा विद्या, चोसष्ट कला, माघारा फिरती ।

चहुदेहाचा भेदुनि किल्ला, राहसि त्यावरती ।।२।।

अखंड साक्षी सदा असंगी, निर्विकल्प ज्योती ।

समरस होउनि अंतरि तुमच्या, प्रगट होइ दीप्ती ।।३ ।।

तुकड्यादास म्हणे किती वानु? न चले मम स्फूर्ती ।

बोधामृत निज-ज्ञान मिळाया, आर्त सखे वरिती ।।4।।